Bewara Tatacara Nyoblos di TPS (Tapi ieu mah sanes ti KPU)

Poe ieu, 17 April 2019, KPU (Komisi Pemilihan Umum) ngajadwalkeun Insya Alloh urang bakal ngalaksanakeun pesta demokrasi pemilu (pemilihan umum) nyaeta bakal nangtukeun milih presiden jeung wakilna, oge sakaligus nyoblos nangtukeun DPD-RI, anggota legislatip DPR-RI, DPRD Propinsi jeung DPRD Kota/kabupaten.

Bewara ieu, sabenerna mah aya ti taun 2018, kuring manggihan bewara ieu di https://web.facebook.com/diCianjur/ nya itung-itung bari heuheureuyan, ulah sutris teuing nyanghareupan pesta demokrasi teh.

Kade omat nya, Ulah silih korowot, ulah silih jongklokeun komo silih keleketek mah, getek atuh.

Oge, tong reuwas nya, aya 5 lambar kertas badag sagede alaihim, anu pinuh ku gambar calon anu bakal dipilih ku urang sadaya.

Sok lah ieu bewarana:

“Ngemutan ka para baraya utamana pikeun anu can pernah pisan nyolok atawa anu geus poho deui kumaha carana nyolok di TPS”.

1. Saacan indit ka TPS, mandi heula ameh katingali kasep atawa geulis. Kade, inditna ka TPS = Tempat Pemungutan Suara, lain TPS = Tempat Pembuangan Sampah! Lamun perlu sun tangan heula ka kolot jeung menta pangrojong du’a ameh salamet di perjalanan.

Mun saderek jomlo, sugan we meunang jodo di lokasi TPS. Oge teu kudu ngayakeun heula syukuran, da lain rek indit umroh. Komo diwawarkeun di TOA masjid: “Baraya…abdi bade ka TPS..! Du’akeun nya..?”.

2. Datang ka TPS ngantri heula teu kudu pasered-sered da lain ngantri sembako atawa BLT.

Komo tuluy moshing atawa headbang mah, da lain konser musik underground. Diuk heula sing bener da lain di warung. Salila diuk nungguan panggilan, bisa maen wa an, Pesbukan,instagram an atawa kenalan jeung sabeulaheun.

Ulah ngomong baceprot sorangan atawa curhat jeung korsi. Kade ulah nundutan, da lain keur numpak DAMRI atawa keur Jumaahan. Pikeun para istri teu meunang ngarumpi di TPS komo bari silih siaran atawa silih cakar mah. Awon katingalna.

3. Bikeun surat panggilan ti KPPS ka panitia terus menta Susu (Surat Suara) anu rek dicolok. Kade salah mawa surat, hayoh kalahkah surat gade cingcin emas nu dibawa.

4, Lamun geus meunang Susu (Surat Suara) Buru-buru bawa ka bilik suara. Tong popotoan di jero, da lain photobox komo bari ngahaleuang di jero mah…da lain tempat karaokean..!

Buka heula suratna samemeh dicolok teh, bisi panitia salah kalahkah mere surat kiriditan motor. Terus pilih ngaran calon anu dipikahayang. Teu kudu bari mendesah, biasa we..!”

5. Lamun geus beres nyolokna, tilepan deui Susuna sing bener. Tong digulung-gulung nepi ka galing, siga mawa surat pengantar RT wae.

Terus asupkeun kana kotak suara, kade tong diasupkeun kana kencleng masjid. Komo diasupkeun kana baham petugas TPS mah. Geus beres, leumpangna biasa we, da lain di catwalk.

6. Lamun anggeus, saacan kaluar ti lokasi TPS, tong dibawa kotak suarana..! Tuluy anclomkeun we hiji ramo urang kana tinta nu geus disadiakeun ku patugas.

Kade ulah dipake tamas atawa dioles-oleskeun kana pipi siga Rambo rek kamuflase di leuweung. Komo dilamotan mah ulah pisan.. da lain mayones…!”

7. Beres kitu mah geura balik ka imah. Ulah ngurilingan jalan lembur bari terus sasalaman menta hampura ka unggal imah, da lain lebaran.

Terus teu kudu gogorowokan: “Urang geus nyolooookkkk…!” 😁

Tah, sakitu bewara tatacara nyoblos di TPS. Sakali deui ieu mah lain pisan ti KPU nya, da ngan keur ubar bisi sarutris nyanghareupan pesta demokrasi anu beuki panas ka level opat lada na mun kiripik Ma Icih mah.